નક્કી નથી !

ક્યાં,કોણ,કોને છેતરે નક્કી નથી
કેવા પ્રકારે વેતરે,નક્કી નથી !

જો જો,કદી ધુત્કારશો નહીં કોઇને
કોનો સમય,ક્યારે ફરે નક્કી નથી !

છે ક્યાંક ઊંડે ભય હજુ,ઈશ્વરતણો
નહીંતર મનુષ્યો શું કરે,નક્કી નથી !

દરિયો જ કાયમ ઘૂઘવે,એવું નથી
કઈ બુંદ,ક્યારે વિસ્તરે નક્કી નથી !

અણસાર છે,બદલી રહી છે જિંદગી
સર્જન-વિસર્જન શું કરે,નક્કી નથી !

શંકાવગર કંઈ જ્ઞાન વિસ્તરતું નથી
કઈ માન્યતા ખોટી ઠરે,નક્કી નથી !

લડવું પડે છે જીવવા,છેલ્લે સુધી
બસ,કોણ જીવે કે મરે નક્કી નથી !

ડો.મહેશ રાવલ

નવેસર/૫૮

બા-અદબ

એક ઈચ્છા સળવળે છે,બા-અદબ
ટેરવે દીવા બળે છે,બા-અદબ

લોઢ ઊછળે લાગણીના,ભીતરે
જેમ દરિયો ખળભળે છે,બા-અદબ

ભૂખ ઉઘડી સાત ભવની,આ ભવે
મર્મ સઘળાં ઓગળે છે,બા-અદબ

સ્હેજપણ અંતર હવે નહીં પાલવે
સર્વ અંતર પીગળે છે,બા-અદબ

શક્ય છે,ઈતિહાસ આલેખે નવો
સરફરોશી ઝળહળે છે,બા-અદબ

થઈજશે સાતેય કોઠા તર-બ-તર
જળ,કમળથી નીકળે છે બા-અદબ

હોય શ્રધ્ધા તો પછી શું જોઇએ ?
એજ સહુને સાંકળે છે,બા-અદબ

ડો.મહેશ રાવલ

નવેસર/૫૭