વચ્ચે !
પગલાં,પગરવ,અટકળ વચ્ચે
રસ્તો જીવે,બે સ્થળ વચ્ચે !
ઊગીનેં આથમતાં સપનાં
કોરા ભીના વાદળ વચ્ચે !
દરિયા જેવો દરિયો નભતો
ઝરણાંઓની ખળખળ વચ્ચે !
ખાલી-ભરચક,ભરચક ખાલી
જોયું-જાણ્યું,અંજળ વચ્ચે !
શું અજવાળું શું અંધારૂં
ખુલ્લંખુલ્લા બે પળ વચ્ચે !
પંખી,માળો,કલરવ,ઉછરે
અસ્તોદયનીં સાંકળ વચ્ચે !
લીલું-સુક્કું હોવું થાવું
સૂરજ શાખે,ઝાકળ વચ્ચે !
ડો.મહેશ રાવલ
નવેસર/૬૩
July 18, 2008 at 7:38 pm
શું અજવાળુ શુ અન્ધારું
ખુલ્લંખુલ્લા બે પળ વચ્ચે
ખૂબ ગમી..અભિનદન મહેશભાઇ..
July 19, 2008 at 6:34 am
આખેઆખી ગઝલ જ સુંદર છે. કોઈ એક ગમતા શેરનું ચયન અશક્ય બની રહે એમ છે…
July 19, 2008 at 9:43 am
વિવેકભાઈની વાત સાથે સંમત. સુંદર ગઝલ. મહેશભાઈ..અમેરીકા બેઠા પણ ાામ ગઝલગંગા વહેવડાવતા રહેજો.