Archive for જાન્યુઆરી 5, 2008

ઈશારો ય કાફી !

Posted in Navesar on જાન્યુઆરી 5, 2008 by DR.MAHESH RAWAL

અમારે, અમારા વિચારો ય કાફી
સમંદર નહીં, તો કિનારો ય કાફી !

જરૂરી નથી કે રહસ્યો ય ખોલો
અકલમંદને, છે ઈશારો ય કાફી !

તમે રાખજો, સૂર્યની અસ્કયામત્
અમારે તો, એકાદ તારો ય કાફી !

નથી ભીડ ખપતી નિરર્થક્-નપુંસક
ખરેટાણે ખપ આવનારો ય કાફી !

સગા હોય એ કઈં બધાં હોય વ્હાલાં?
અરે! એક સાચો સહારો ય કાફી !

બધાં ક્યાં સફળ થઈ શકે, સર્વ રીતે
સફળ થઈ જવાનો ધખારો ય કાફી !

ઝળુંબે સતત ભય, જ્વલનશીલ માથે
બધું ભસ્મ કરવા, તિખારો ય કાફી !

ડૉ.મહેશ રાવલ

નવેસર/૨૩

Advertisements