અજાણ્યું ક્યાં હતું !
આ તબક્કે, કોઇ પણ કારણ અજાણ્યું ક્યાં હતું
જે થયું એ થઈ જવાનું પણ, અજાણ્યું ક્યાં હતું !
ઝળહળે છે રાતભર, જાહોજલાલી રાતની
પણ, દિવસનાં તેજનું ભારણ અજાણ્યું ક્યાં હતું ?
પી ગયો છું એ ભરોસે, હર વકલનું ઝેર હું
એમનાથી એક પણ મારણ અજાણ્યું ક્યાં હતું !
ગોઠવેલાં હોય છે આશ્વાસનો, સંબંધનાં
દરઅસલ, હર દર્દનું તારણ અજાણ્યું ક્યાં હતું !
કોઇ પાસે ક્યાં હતું સંજીવની જેવું કશું?
જિંદગી છે મોતની થાપણ, અજાણ્યું ક્યાં હતું !
ડૉ.મહેશ રાવલ
નવેસર/૨૪
જાન્યુઆરી 8, 2008 at 5:20 એ એમ (am)
ઝળહળે છે રાતભર જાહોજલાલી રાતની
પણ દિવસનાં તેજનું ભારણ અજાણ્યું ક્યાં હતું ?
કોઇ પાસે ક્યાં હતું સંજીવની જેવું કશું?
જિંદગી છે મોતની થાપણ, અજાણ્યું ક્યાં હતું !
-સુંદર ગઝલ… આ બે શે’ર લાજવાબ થયા છે…