Archive for જુલાઇ, 2008

થયાં છે !

Posted in Navesar on જુલાઇ 26, 2008 by DR.MAHESH RAWAL


કેટલાક એવા ય સરવાળા થયાં છે
ફૂલ ઓથે શૂળ રૂપાળા થયાં  છે !

એ અલગ છે કે નથી કંઈ યાદ રાખ્યું
તોય ઝખ્મો હર પળે આળા થયાં છે !

ભૂલ થઈગઈ લાગણીશીલ થવાનીં
ત્યારથી,આ લોહીઉકાળા થયાં છે !

જે હતી,છે એ જ આખી વાત કેવળ
પાત્રવરણીમાં જ ગોટાળા થયાં છે !

કંઈક છે,જે આપે છે હૂંફ નિરંતર
એટલે આ શ્વાસ હૂફાળા થયાં છે !

કેટલા દીવા મથીને ઓલવાયા
તોય તળિયે ક્યાંય અજવાળા થયાં છે ?

રોજ ઠલવાતા હશે ત્યાં સ્વપ્નના શબ
આંખ નીચે,એના જ કૂંડાળા થયાં છે !

ડો.મહેશ રાવલ

નવેસર/૬૫

Advertisements

આપણી વાત !

Posted in Navesar on જુલાઇ 22, 2008 by DR.MAHESH RAWAL

રેતી,દરિયો,પથ્થર માણસ
તડકો,છાંયો,ઝરમર માણસ

રસ્તો,કેડી,ભેખડ,કોતર
માટી,સંગેમરમર માણસ

પર્ણો,ડાળી,કૂંપળ,કાંટા
લીલી-પીળી કળતર માણસ

પંખી,માળો,પીંછા,ટહુકો
ફડકો,ડૂમો,થરથર માણસ

શબ્દો,વાણી,ટીકા,ટિપ્પણ
બરછટ,લીસ્સો,અક્ષર માણસ

જીવન,સપનાં,ઈચ્છા,વળગણ
ધીમું-ધીમું ગળતર માણસ

અફવા,કિસ્સો,ચર્ચા,ચણભણ
અડધો,આખો,ઉત્તર માણસ

ઢીલો,પોચો,અથરો,ધીરો
નફ્ફટ,નક્ટો,નક્કર માણસ

આઘો,ઓરો,ભીતર-બ્હારે
ઝાંખો,પાંખો,ઈશ્વર માણસ !

 

.મહેશ રાવલ

નવેસર/૬૪

વચ્ચે !

Posted in Navesar on જુલાઇ 18, 2008 by DR.MAHESH RAWAL

પગલાં,પગરવ,અટકળ વચ્ચે
રસ્તો જીવે,બે સ્થળ વચ્ચે !

ઊગીનેં આથમતાં સપનાં
કોરા ભીના વાદળ વચ્ચે !

દરિયા જેવો દરિયો નભતો
ઝરણાંઓની ખળખળ વચ્ચે !

ખાલી-ભરચક,ભરચક ખાલી
જોયું-જાણ્યું,અંજળ વચ્ચે !

શું અજવાળું  શું અંધારૂં
ખુલ્લંખુલ્લા બે પળ વચ્ચે !

પંખી,માળો,કલરવ,ઉછરે
અસ્તોદયનીં સાંકળ વચ્ચે !

લીલું-સુક્કું હોવું થાવું
સૂરજ શાખે,ઝાકળ વચ્ચે !

ડો.મહેશ રાવલ

નવેસર/૬૩

ન પામ્યા !

Posted in Navesar on જુલાઇ 16, 2008 by DR.MAHESH RAWAL

હતો પ્રશ્ન એવું,નિવારણ ન પામ્યા
ન માફી મળી કે,સજા પણ ન પામ્યા !

નથી રૂપ ઝાંખું થયું કે નજર,પણ
અલગ છે હજુ કોઇ દર્પણ ન પામ્યા !

રહી સાવ નિર્જન હવેલી,હ્રદયનીં
કદી કોઇનીં આવ-જા પણ ન પામ્યા !

રહ્યો એજ અફસોસ કે જિંદગીભર
અમસ્તા અમસ્તા ય,શ્રાવણ ન પામ્યા !

દયા ખાય છે દુશ્મનો પણ અમારી
અમે,દોસ્ત જેવું ય સગપણ ન પામ્યા !

ઘણીવાર એવી દશા ભોગવી છે
કે છેલ્લેસુધી કોઇ કારણ ન પામ્યા !

કરી છે બધાએ ઉપેક્ષા જ કાયમ
મરણ બાદ તેથી જ,ખાપણ ન પામ્યા !

ડો.મહેશ રાવલ

નવેસર/૬૨

ચર્ચા ન કર

Posted in Navesar on જુલાઇ 12, 2008 by DR.MAHESH RAWAL

 
વીતી ગયેલી પળ વિષે,ચર્ચા ન કર
સપના વિષે,અટકળ વિષે,ચર્ચા ન કર!

લોકો ખુલાસા માગશે સંબંધના
તેં આચરેલા છળ વિષે,ચર્ચા ન કર !

ચર્ચાય તો,ચર્ચાય છે સઘળું પછી
તું આંસુ કે અંજળ વિષે,ચર્ચા ન કર!

એકાદ હરણું હોય છે સહુમાં અહીં
તું જળ અને મૃગજળ વિષે,ચર્ચા ન કર!

જે સત્ય છે તે સત્ય છે,બે-મત નથી
અમથી,અસતના બળ વિષે ચર્ચા ન કર!

ડો,મહેશ રાવલ

નવેસર/૬૧