Archive for સપ્ટેમ્બર, 2008

નહીં મળું !

Posted in Navesar on સપ્ટેમ્બર 23, 2008 by DR.MAHESH RAWAL

વિસ્તરેલી દૂરતામાં નહીં મળું
હું,અધૂરી વારતામાં નહીં મળું !

છે અલગ ઐશ્વર્ય મારું અન્યથી
ભીડની સંદિગ્ધતામાં નહીં મળું !

યોગ્યતા આગળ નમન સ્વીકાર્ય છે
પણ,નમાલી નમ્રતામાં નહીં મળું

થઈ શકે તો,બુંદ મોતી થઈ શકે
હું વિપુલ નિરર્થતામાં નહીં મળું !

ક્યાંક દીવો થઈ કદાચિત્ ઝળહળું
આંધળી ઘેઘૂરતામાં નહીં મળું !

નીકળું ક્યારેક ભીનાં મૌનમાં
અર્થહીન વાચાળતામાં નહીં મળું !

મેં ઘરોબો કેળવ્યો છે,શેષથી
જોઇ લેજો!શૂન્યતામાં નહીં મળું

પહોંચશે,તે પામશે ત્યાં-ટોચ પર
હું હવે,પાછા જતામાં નહીં મળું

ટૂંકમાં,સાકર ભળી ગઈ દૂધમાં
તારવો મા,ભીન્નતામાં નહીં મળું !

ડો.મહેશ રાવલ

નવેસર/૭૫

પ્રશ્નાર્થ છે !

Posted in Navesar on સપ્ટેમ્બર 21, 2008 by DR.MAHESH RAWAL

ગુપ્ત ચર્ચા થાય ત્યાં,પ્રશ્નાર્થ છે
સત્ય જ્યાં ઢંકાય ત્યાં,પ્રશ્નાર્થ છે

ભિન્ન છે આશય બધાનાં,તે છતાં
હાથ,જ્યાં લંબાય ત્યાં પ્રશ્નાર્થ છે

ક્યાંસુધી ટકશે ખબર ક્યાં હોય છે ?
ગાંઠ જ્યાં બંધાય,ત્યાં પ્રશ્નાર્થ છે

મૂળ રસ્તાથી અજાણ્યું કોણ છે ?
માર્ગ જ્યાં ફંટાય ત્યાં,ત્યાં પ્રશ્નાર્થ છે

અર્થ કેવળ ત્યાગ છે,આ પ્રેમનો
સગવડે બદલાય ત્યાં પ્રશ્નાર્થ છે !

આગિયા ક્યાં ઓળખે છે સૂર્યને ?
તોય,દાવો થાય ત્યાં પ્રશ્નાર્થ છે !

છે બધાને જિંદગી વ્હાલી છતાં
મોત વ્હાલું થાય ત્યાં પ્રશ્નાર્થ છે !

ડો.મહેશ રાવલ

નવેસર/૭૪

અંકે કરો !

Posted in Navesar on સપ્ટેમ્બર 16, 2008 by DR.MAHESH RAWAL

સાવ અમથી વાતને,અંકે કરો
આ,લપસણી જાતને અંકે કરો !

ક્યાં હતું ઊંડાણ જેવું કંઈ હવે
છીછરી ઓકાતને,અંકે કરો !

ખુદ બળીને બાળનારી છે વકલ
ઝટકરો,જઝબાતને અંકે કરો !

બે-અસર છે હર અસરથી જિંદગી
ઘાત-પ્રત્યાઘાતને અંકે કરો !

બેવડાતી જાય છે,કારણવગર
શ્વાસની ખેરાતને અંકે કરો !

લ્યો,મળસ્કું થઈગયું ક્યાં વાર છે ?
આગિયાઓ ! રાતને અંકે કરો.

એજ કરશે આખરી નિર્ણય,હવે
વ્યર્થ ચંચૂપાતને અંકે કરો !

ડો.મહેશ રાવલ

નવેસર/૭૩

ઓળખો છો ?

Posted in Navesar on સપ્ટેમ્બર 12, 2008 by DR.MAHESH RAWAL

એક સન્નાટો તરે છે,ઓળખો છો ?
શખ્સ થઈ,ઇચ્છા ફરે છે ઓળખો છો ?

ઓળખીતાં અર્થના સંદર્ભ વચ્ચે
ફીણ જેવું વિસ્તરે છે,ઓળખો છો ?

વારતાનાં પાત્ર જેવું હાસ્ય વેરી
ગોઠવેલાં ડગ ભરે છે ઓળખો છો ?

લાલ-પીળાં પોત જેવું પાથરીને
સાવ ધોળું કરગરે છે,ઓળખો છો ?

ફૂલસામે જોઇનેં,નિઃશ્વાસ નાંખી
છુંદણાંને ખોતરે છે,ઓળખો છો ?

શું નહીંતર ઉપજે છે,શૂન્યથી !
તોય સરવાળાં કરે છે,ઓળખો છો ?

હોય છે મશગૂલ ચર્ચામાં મરણની
જિંદગીથી થરથરે છે,ઓળખો છો ?

ડો.મહેશ રાવલ

નવેસર/૭૨

ગોઠવી જોજે !

Posted in Navesar on સપ્ટેમ્બર 5, 2008 by DR.MAHESH RAWAL


નદીનો અર્થ, તારા નામ સામે ગોઠવી જોજે
બને તો, બેય કાંઠા સામ સામે ગોઠવી જોજે !

બદલતા જાય છે રંગો વસંતે કેમ પર્ણોનાં
અસર ને ગ્રસ્ત, તું સરેઆમ સામે ગોઠવી જોજે !

કસોટી કમ નથી કરતી પ્રતીક્ષા, ધૈર્ય માગે છે
અહલ્યા થઈ, પ્રવાસી રામ સામે ગોઠવી જોજે !

દુઆ મોડી ફળે, તો એ વિષય ક્યાં એકલાંનો છે ?
ઘડેલા વ્યુહનેં, પરિણામ સામે ગોઠવી જોજે !

પછી તો હું ય ખુલ્લેઆમ આખી વાત કરવાનો
પ્રથમ, બે-ચાર ભરચક જામ સામે ગોઠવી જોજે !

હતી ક્યાં હસ્તરેખા જો! હથેળી સાવ કોરી છે
ઉઘડતાં કામને, નિષ્કામ સામે ગોઠવી જોજે !

ડો.મહેશ રાવલ

નવેસર/૭૧