જણાયાં છે !

અષાઢી આંખમાં,મૃગજળ જણાયાં છે
અધિક્તર માણસો,વાદળ જણાયાં છે !

દિવસનીં જેમ ખુલ્લેઆમ જોયું તો
ઘણાં નક્કર તમસ,પોકળ જણાયાં છે !

અપેક્ષા કેમ રાખું સ્થિરતા જેવી ?
અહીં પ્રત્યેક મન,ચંચળ જણાયાં છે !

ફરી ગઈ છે ઘણીં વ્યાખ્યા,સમય સાથે
ઘણાં સ્થાપિત રહસ્યો,છળ જણાયાં છે !

નથી કરતાં સ્વયં સ્વીક્રૃત બળીનેં,પણ
મને,એ સિંદરીમાં વળ જણાયાં છે !

કસોટી કોણ કરશે અર્ધસત્યોનીં?
સ્વયં ઈશ્વર,મને વિહવળ જણાયાં છે !!

ડૉ.મહેશ રાવલ

નવેસર/૩૬