ખાસ કારણ હોય છે !
અર્થના વિસ્તાર પાછળ, ખાસ કારણ હોય છે
હર ઉઘડતા દ્વાર પાછળ, ખાસ કારણ હોય છે !
હોય ઘટના આપણી, કે હોય કિસ્સો અન્યનો
બેયની ચક્ચાર પાછળ, ખાસ કારણ હોય છે !
સાવ અમથું ક્યાં હતું, આ શૂન્યનું હોવાપણું
હર નવા આકાર પાછળ, ખાસ કારણ હોય છે !
કોઇ અમથું કોઇને મળતું નથી, આ વિશ્વમાં
દુશ્મની કે પ્યાર પાછળ, ખાસ કારણ હોય છે !
એ ખરૂં કે, મોત સામે હારવાની જિંદગી
દરઅસલ એ હાર પાછળ, ખાસ કારણ હોય છે !
કોઇ માને દેરથી તો કોઇ વેળાસર, છતાં
સત્યનાં સ્વીકાર પાછળ, ખાસ કારણ હોય છે !
પુણ્ય કરતાં તો અધિક, પાપ નીકળે છે નિમિત્ત
ઈશ્વરી અવતાર પાછળ, ખાસ કારણ હોય છે !
જેમ સીધા કારણોસર થાય છે સ્વીકૃત કશુંક
એમ અસ્વીકાર પાછળ, ખાસ કારણ હોય છે !
ડૂબતો જીવ હોય છે તત્પર, તણખલું ઝાલવા
એટલાં આધાર પાછળ, ખાસ કારણ હોય છે !
ડો.મહેશ રાવલ
નવેસર/૪૫
માર્ચ 12, 2008 at 9:03 એ એમ (am)
khub saras……!!
koi ek sher nahi aakhi gazal
j copy – paste karvi padshe !!
માર્ચ 13, 2008 at 2:19 એ એમ (am)
સંબંધોના મેઘધનુષી રંગો લાગણીશીલ હૃદયમાં ઉતરી જાય પછી તે શબ્દો બની ફુટી નીકળે ત્યારે જીંદગીનું–સંબંધોનું વાસ્તવીક સ્વરુપ નજર સમક્ષ પ્રગટે છે…..નમુનો જુઓ…
કોઇ અમથું કોઇને મળતું નથી, આ વિશ્વમાં
દુશ્મની કે પ્યાર પાછળ, ખાસ કારણ હોય છે !
પુણ્ય કરતાં તો અધિક, પાપ નીકળે છે નિમિત્ત
ઈશ્વરી અવતાર પાછળ, ખાસ કારણ હોય છે !
મહેશભાઈ…મઝા આવી.