હસ્તરેખા પર જરા આધાર રાખી જોઇએ
સાવ નક્કર ભીંત વચ્ચે, દ્વાર રાખી જોઇએ !
ઘરત્યજી નીકળે નદી, બસ એમ સપનાં નીકળે
એક દરિયો પાપણે તૈયાર રાખી જોઇએ !
વ્યાજબી કારણવગર ઈતિહાસ ક્યાં બદલાય છે ?
આપણો કિસ્સો ખુલાસાવાર રાખી જોઇએ !
આ સ્થળે સંદિગ્ધતાથી શું વધારે પ્રાપ્ય છે ?
શૂન્ય સામે શેષનો વ્યવહાર રાખી જોઇએ !
જાગતી આંખો ઉપર છંટાય છે દ્રષ્યો સતત
બંધ આંખે, કૈંક અપરંપાર રાખી જોઇએ !
પર્વનાં પર્યાય નક્કી કોણ કરશે આખરે !
એ અનુત્તર પ્રશ્ન, ચર્ચા બ્હાર રાખી જોઇએ
ઓગળે, તો છુંદણાનેં ફૂટશે વાચા હવે
ટેરવાનો તાપ ઠંડોગાર રાખી જોઇએ !
ડો.મહેશ રાવલ
નવેસર/૬૬